أنا جيتك غلا..!!

تعال أبيك تقرا ما كتبته زين
تراني كاتبه من داخل أعماقي

وترى لي قلب واحد ما معي قلبين
ولي خاطر سموح ولا بعد ضاقي

تراك أنت الوحيد اللي اقسمه نصفين
أمانه دامتك راحل خذ الباقي

قبل ترحل ترى لي ف رقبْتك دين
نويت أصارحك ثم اكشف أوراقي

لقيتك تايهٍ تطرد ورى المقفين
لقيتك في حياتك مُتعباً شاقي

لقيتك وأنت تصفق يدّك الثنتين
تهيم بعتم ليلٍ ماله إشراقي

لقيتك تفترش همّ الفراق سنين
تدور من لهيب الوقت لك واقي

لقيتك والحياه والموت بين وبين
لقتيك كـ ارض بور ومالها ساقي

لقيتك وأنت ماتدري تروح لمين
زبنت وخاب طلابك وأنا الراقي

أنا ما أقول جيت آمِّد لك كفين
ولا كان احتوائي لك من اشفاقي

قسم بـ اللي خلقني وخالقك من طين
ألا ي فرحتي بك مالها آفاقي

أنا ماجيت لك لاعب على الحبلين
حشى والله ولا هذي من أخلاقي

انا جيتك غلا ماشي على الرجلين
انا جيتك خطاي تسابق اشواقي!!
،
الشفق
* سبق النشر.

عبير الليل ,خفوق ,رفيفَ ,احمد داود الطريفي معجبون بهذا