ليت السما .. لا دعيت الله تمطر وصال..!!
..
واحد هو الحِزن لو كِثرت وجيه الليال !
....... ياوقت ... لا تقفل أبوابك عليّ .. و تشين !
حظي يدينه قصيره .. والأماني طوال !
....... والريح عن عالي أفكاري ... مـ تبّت يدين !
ناديت صدفه .. تهاوت بي بيوتٍ جزال
....... سافرت .. لكن طريق العمر .. برد وحنين !
يـ الله أبفتح على سُور المقادير / فال
........ محتاج آمرّر خلاله .. كل مابي .. سجين !
هذا البلد : صُبح كسلان و شقاوة عيال
.... فيه البشر : يحسبون المال .. سحرٍ مبين !
عطشان ياطفلة الما يا إنتعاش الزلال !
..... غيمك خذلني .. ولا لي بعد ربك .. معين !
الهمّ : رحله طويله .. ترفض الاختزال
....... والحب : لوحه نستها الشمس في بيت طين
وأنتي مع كبرياءك ... نايمه بالحلال !
..... وانا أقطّع ورودي .. ياتجين .. أو ما تجين !
ليت السما .. لا دعيت الله تمطر وصال
....... ما كان جفّ الخفوق و صار شكلي حزين !
ذنبي زرعتك فـ بستاني .. بلحظة زوال
........ ذنبك : رحلتي مع النسيان .. خلف السنين
فيني من الكادحين .. الصبر و الإعتدال
..... إنسان قُوتي .. على كثر إحتياجي [ يقين ]
اصحابي إن رحت عنهم صوّتو لي تعال
..... وإن جيت : شبّوا فوانيس الجفا .. مبعدين
يطردني الحكي | وآتهرّب من الإنفعال !
...... لين أتعثر .. بواقع .. للمصالح .. رهين !
طفلٍ تعوّدت أوزّع ضحكتي [ برتقال ] !
......... للناس .. لأ شباه تشبه ناس .. للعابرين !
مرّي / قبل تتلف آمالي هبوب الشمال !
......بعض الغلا ... يذبح الرجّال .. لو مايبين !
صدري حديقه .. حو اليها المواجع ظلال
..... عمرك سمعتي حديقه .. تفتقد .. ياسمين ؟
|
|
|